ఓటు ఫ్రమ్ హోమ్ : అర్హులెవరు, దరఖాస్తు ఎలా, ఓటు ఎలా వేయాలి..?

ప్రపంచంలోనే అతిపెద్ద ప్రజాస్వామ్య దేశమైన భారత్‌లో ఎన్నికలు నిర్వహించడం కత్తిమీద సాము వంటిది. కానీ దశాబ్ధాలుగా ఈ ప్రక్రియను విజయవంతంగా నిర్వర్తిస్తూ వస్తోంది భారత ఎన్నికల సంఘం. ఎప్పటికప్పుడు విప్లవాత్మకమైన నిర్ణయాలు, సంస్కరణలు తీసుకొస్తూ ముందుకు సాగుతోంది ఈసీ. 

ఇకపోతే..  సార్వత్రిక ఎన్నికలకు దేశంలో నగారా మోగింది. మొత్తం 7 దశలలో లోక్‌సభతో పాటు 4 రాష్ట్రాల అసెంబ్లీలకు ఎన్నికలు నిర్వహించనుంది ఎలక్షన్ కమీషన్. ఈ క్రమంలోనే దేశంలోనే తొలిసారిగా ఓటు ఫ్రమ్ హోం అవకాశాన్ని పూర్తి స్థాయిలో అమలు పరచాలని ఈసీ నిర్ణయించింది. ఈ నేపథ్యంలో అసలు ఇంటి నుంచి ఎలా ఓటు వేయాలి.. ఇంటి నుంచి ఓటు వేసేందుకు అర్హత, దరఖాస్తు విధానం ఏంటి అనేది పరిశీలిస్తే.. 

ఓటు ఫ్రం హోమ్‌కు అర్హత ఏంటీ :

85 ఏళ్లు పైబడిన వృద్ధులు, 40 శాతం కంటే ఎక్కువ అంగవైకల్యం వున్న దివ్యాంగ ఓటర్లను ఓటు ఫ్రమ్ హోమ్‌కు అర్హులుగా ఎన్నికల సంఘం పేర్కొంది. ఈ సౌకర్యాన్ని వినియోగించుకునేందుకు దేశంలో 1.73 కోట్ల మంది అర్హులైన వారు వున్నట్లు ఈసీ పేర్కొంది. 85 ఏళ్లు పైబడిన ఓటర్లు 82 లక్షల మంది.. 100 ఏళ్లకు పైబడిన వారు 2.18 లక్షల మంది, 40 శాతానికి పైగా అంగవైకల్యం వున్నవారు 88.4 లక్షల మంది వున్నట్లు ఎన్నికల సంఘం వెల్లడించింది. 

ఓటు ఫ్రమ్ హోంకు దరఖాస్తు విధానం :

ఎన్నికల నోటిఫికేషన్ విడుదలైన నాటి నుంచి 5 రోజుల్లోపు ఓటు ఫ్రమ్ హోమ్ కోసం దరఖాస్తు చేసుకోవాల్సి వుంటుంది. దీని కోసం ఫాం 12 డీ పూర్తి చేసి రిటర్నింగ్ అధికారికి గానీ, సహాయ రిటర్నింగ్ అధికారికి గానీ పంపించాల్సి వుంటుంది. దరఖాస్తులో తప్పనిసరిగా తమ పూర్తి చిరునామా, ఫోన్ నెంబర్ రాయాలి. అర్హులైన వారికి ఇళ్లకు అధికారులు వచ్చి దరఖాస్తులను అందజేస్తారు. వీనటిని పూర్తి చేసి 5 రోజుల్లోగా బీఎల్ఓలకు సమర్పించాలి. అనంతరం బూత్ స్థాయి అధికారులు దరఖాస్తుదారుడి ఇంటికి వెళ్లి పరిశీలించి.. వారు ఓటు ఫ్రమ్ హోమ్‌కు అర్హులా , కాదా అనే విషయాన్ని నిర్ధారిస్తారు. 

అనంతరం ఎన్నికల సిబ్బంది మొబైల్ వాహనంలో ఓటరు ఇంటికి వద్దకు చేరుకుని పోస్టల్ బ్యాలెట్ అందజేస్తారు. ఎన్నికల అధికారులు చెప్పిన ప్రదేశంలో ఓటరు రహస్యంగా ఓటు వేసి తన  ఓటును బ్యాలెట్‌లో వేయాల్సి వుంటుంది. ఆ సమయంలో పోలీస్ అధికారి, ఇద్దరు పోలింగ్ అధికారులతో పాటు ఓ వీడియో గ్రాఫర్ వుంటారు. ఆ నియోజకవర్గంలో ఎన్నికలకు ఒకరోజు ముందుగానే ఈ ప్రక్రియను పూర్తి చేస్తారు. ఓటు వేసిన తర్వాత బ్యాలెట్ పేపర్లను ఆర్వో వద్ద భద్రపరుస్తారు. కౌంటింగ్ రోజున ఇతర ఓట్లతో పాటే వీటిని కూడా లెక్కిస్తారు.